Բրազիլում նշվել է Հայաստանի Հանրապետության անկախության 34-րդ տարեդարձը

30 հոկտեմբերի, 2025

Բրազիլի Դաշնային Հանրապետության մայրաքաղաքում՝ հռչակավոր «Teatro Poupex» համերգասրահում, տեղի է ունեցել տոնական համերգ՝ նվիրված Հայաստանի Հանրապետության անկախության 34-րդ տարեդարձին։ Լեցուն դահլիճում Ազգային սիմֆոնիկ նվագախմբի կատարմամբ հնչել են 20-րդ դարի հայ երաժշտության՝ Կոմիտասի, Ա․ Խաչատրյանի, Ա․ Բաբաջանյանի, Ա․ Հարությունյանի, Է․ Միրզոյանի, Է․ Բաղդասարյանի և այլ երգահանների լավագույն ստեղծագործությունները։

Միջոցառման բացման խոսքով հանդես է եկել Բրազիլում Հայաստանի Հանրապետության դեսպան Արմեն Եգանյանը, ով շնորհավորել է ներկաներին անկախության տոնի կապակցությամբ։ Դեսպան Եգանյանը իր խոսքում անդրադարձել է Հայաստանի անկախության խորհրդին, վերջին տարիներին իրականացվող ժողովրդավարական և տնտեսական բարեփոխումներին, երկրի զարգացման դինամիկային, հարուստ մշակութային ժառանգությանը, ինչպես նաև ՀՀ և ԲԴՀ միջև դինամիկ զարգացող հարաբերություններին։

Այնուհետև խոսքով է հանդես եկել Բրազիլի արտաքին գործերի նախարարի տեղակալ, դեսպան Ռոբերտո Աբդալան, որը բարձր է գնահատել Հայաստանի և Բրազիլի միջև ձևավորված քաղաքական երկխոսությունը՝ ընդգծելով միջազգային հարթակներում երկու երկրների արդյունավետ համագործակցությունը։ Դեսպան Աբդալան անդրադարձել է նաև այս տարվա նոյեմբերին Բրազիլում անցկացվող COP30 համաժողովի, ինչպես նաև հաջորդ տարի Հայաստանում կայանալիք COP17-ի կարևորությանը՝ նշելով դրանցում երկու երկրների ընդհանուր ջանքերի նշանակությունը։ Նա ողջունել է Հայաստանի կառավարության կողմից իրականացվող ժողովրդավարական բարեփոխումները և հաջողությունները տնտեսական ոլորտում։

Միջոցառմանը ներկա էին Բրազիլի պետական պաշտոնյաներ, դիվանագիտական կորպուսի ներկայացուցիչներ, հասարակական և մշակութային գործիչներ, գործարարներ, ինչպես նաև հայ համայնքի անդամներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր