Դեսպան Արման Հակոբյանի հոդվածը Correio Braziliense օրաթերթում

08 սեպտեմբերի, 2020

Սեպտեմբերի 5-ին Բրազիլիա քաղաքի առաջատար Correio Braziliense օրաթերթում հրապարակվել է Բրազիլիայի Դաշնային Հանրապետությունում Հայաստանի դեսպան Արման Հակոբյանի «Խաղաղության որոնում Հարավային Կովկասում» հոդվածը https://www.correiobraziliense.com.br/opiniao/2020/09/4873425-em-busca-da-paz-no-sul-do-caucaso.html?fbclid=IwAR3jRjnKvb0PU5iJg_-5A5Df4X7-ULEoRCL8JoQQoMEcVH-uTNB8g5XlKOw:

Ստորև ներկայացվում է հոդվածի ամբողջական թարգմանությունը։

ԽԱՂԱՂՈՒԹՅԱՆ ՈՐՈՆՈՒՄ ՀԱՐԱՎԱՅԻՆ ԿՈՎԿԱՍՈՒՄ

ԱՐՄԱՆ ՀԱԿՈԲՅԱՆ

Բրազիլիայի Դաշնային Հանրապետությունում Հայաստանի դեսպան

Օգոստոսի 25-ի համարում Correio Braziliense-ն հրապարակեց Էլխան Պոլուխովի «Ադրբեջանի և Հայաստանի հակամարտությունը» հոդվածը: Դրանում հեղինակը խեղաթյուրում է իրողությունը վերջերս Հայաստանի և Ադրբեջանի սահմանին տեղի ունեցած սրման վերաբերյալ և մեղքը բարդում Հայաստանի վրա: Իրավիճակն իրականում միագամայն հակառակն էր:

Ինչպես հաճախ պատահել է 1994-ի հրադադարից ի վեր՝ Ադրբեջանը կրկին հանձնվեց գայթակղությանը՝ փորձարկելու զենքերը, որոնց համար վերջին տասնամյակների ընթացքում վճարվել են միլիարդավոր դոլարներ, ինչպես նաև ստուգել հայկական բանակի՝ հարձակմանը դիմագրավելու կարողությունը: Փորձերը ձախողվեցին, ինչպես և 2016-ի ապրիլին ադրբեջանական զանգվածային հարձակման ժամանակ, որը երկու կողմերից երիտասարդ զինվորների ցավալի և անհարկի մահվան պատճառ դարձավ:

Ադրբեջանն այն երկիրն է, որը չսատարեց համաճարակի ընթացքում ՄԱԿ-ի Գլխավոր քարտուղարի զինադադարի կոչը, բայց զինադադարի խախտման համար մեղադրում է Հայաստանին, մի երկիր, որն առաջիններից մեկը սատարեց այն: Ադրբեջանը մշտապես մերժել է սահմանի երկայնքով հրադադարի ռեժիմի խախտումների հետաքննման մեխանիզմներ ստեղծելու և երկու կողմերից դիպուկահարներին հեռացնելու հայկական առաջարկները:

Իր քաղաքական օրակարգում Հայաստանը չունի որևէ խնդիր, որը կպահանջեր այլ երկրի դեմ ռազմական ուժի կիրառում: Մենք գտնում ենք, որ Լեռնային Ղարաբաղի շուրջ հակամարտությունը չի կարող լուծվել զենքով, այլ միայն խաղաղ ճանապարհով `բանակցությունների միջոցով` նպատակ ունենալով հասնել Հայաստանի, Ադրբեջանի և Լեռնային Ղարաբաղի ժողովուրդների համար ընդունելի համաձայնության:

Ադրբեջանն այլ կերպ է գործում: Նա ատելության խոսք է օգտագործում ընդդեմ Հայաստանի և հայերի, դիմում է ծայրահեղ ռազմատենչ հռետորաբանությանը և անընդհատ տարածքային պահանջներ է ներկայացնում Հայաստանի, մասնավորապես՝ նրա մայրաքաղաքի նկատմամբ:

Վերջին սրացման օրերին նույնիսկ հայտարարվեց, որ ադրբեջանական հրթիռները կարող են խոցել հայկական ատոմակայանը: Դա պետության կողմից միջուկային ահաբեկչություն իրականացնելու աննախադեպ սպառնալիք է:

Անհրաժեշտ է այս համատեքստում ավելացնել Բուդապեշտում՝ քնած հայ գործընկերոջը կացնահարած ադրբեջանական բանակի սպա Ռամիլ Սաֆարովի գործը: Հունգարիայում ցմահ բանտարկություն ստանալուց հետո նա արտահանձնվեց Ադրբեջան, որտեղ ժողովրդական խանդավառության պայմաններում նախագահ Իլհամ Ալիևը նրան իսկական հերոս և հայրենասեր հռչակեց:

Հոդվածում նշվում է, որ մի շարք երկրներ և միջազգային կազմակերպություններ դատապարտել են «հայկական ագրեսիան»: Դրա վերաբերյալ որևէ փաստարկ չի ներկայացվում: Արդյո՞ք դրանք գոյություն ունեն: Ապա Հայաստանը մեղադրվում է էթնիկական զտումներ իրագործելու մեջ:

Հարկ է հիշել, որ տարածաշրջանում առաջին էթնիկական զտումներն իրականացրել է Ադրբեջանը Նախիջևանում (Ստալինի կողմից Ադրբեջանին փոխանցված հայկական նահանգ, որն արդյունքում մաքրազտվեց հայկական բնակչությունից և որտեղ ամբողջությամբ ոչնչացվեց նրա քրիստոնեական ժառանգությունը, այդ թվում փորագրված բացառիկ տապանաքարերով միջնադարյան գերեզմանատունը): Լեռնային Ղարաբաղի հակամարտության սկիզբը նշանավորվեց հայկական լայնածավալ ջարդերով 1988-ին ադրբեջանական Սումգաիթ քաղաքում և 1990-ին` մայրաքաղաք Բաքվում:

Բազմաթիվ երկրների՝ այդ թվում Բրազիլիայի հայկական համայնքները փորձության ժամին աջակցություն ցուցաբեցին իրենց պատմական հայրենիքին և, որոշ դեպքերում, ստիպված եղան ուս ուսի կանգնել Հայաստանի դիվանագիտական առաքելությունների առջև՝ մոլեգնած ազերի արմատականներից պաշտպանելու համար: Դա նրանք արեցին խաղաղ և քաղաքակիրթ ձևով:

Հայկական ծագմամբ բրազիլացիները ամբողջապես ինտեգրված են Բրազիլիայում և նպաստում են իրենց հայրենիքի առաջընթացին: Նրանց «անընդունելի հանցագործությունների» մեջ մեղադրելը, ինչպես ասված է հոդվածում, առնվազն անարդար է:

Հազարավոր կիլոմետրեր հեռավորության վրա ընթացող հակամարտությունների մեջ Բրազիլիան ներքաշելու և երրորդ երկրի հետ նրա հարաբերությունները սաբոտաժի ենթարկելու փորձերը, ներառյալ կասկածելի քաղաքական բովանդակությամբ գովազդային վահանակների տեղադրումը, ակնհայտորեն հակասում է դիվանագիտական էթիկային:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր